તામિલનાડુમાં અંતે ગઠબંધન
નવી દિલ્હી, તા. 9 : લોકસભા ચૂંટણી પહેલા કોંગ્રેસ માટે એક સાંધે ત્યાં તેર તૂટે જેવી સ્થિતિ વચ્ચે દક્ષિણમાં ડીએમકે સાથે બેઠકોની વહેંચણી અંગે સમજૂતી કરી છે. ડીએમકેની આગેવાની હેઠળના ગઠબંધનમાં 7 દળો જોડાઈ ગયા છે. કોંગ્રેસમાંથી મોટાપાયે હિજરત વચ્ચે તમિલનાડુમાં કોંગ્રેસ માટે ગઠબંધન કરવામાં ભારે વિલંબ થયો હતો. અંતે 6 દળ જોડાઈ ગયા બાદ કોંગ્રેસે બેઠકોની વહેંચણી મામલે વાટાઘાટ સફળ રીતે પાર પાડી હતી. સ્ટાલિને સહયોગીઓને એકજૂટ કર્યા છે. તમિલનાડુમાં કોંગ્રેસને 1 બેઠક મળ્યાનું કોંગ્રેસના એક વરિષ્ઠ નેતાએ શનિવારે મોડેથી જણાવ્યું હતું. કોંગ્રેસ અને ડીએમકે વચ્ચે થયેલી ડીલની સત્તાવાર જાહેરાત ટૂંક સમયમાં કરવામાં આવશે.
તમિલનાડુમાં સત્તારુઢ ડીએમકે એ અંતે કોંગ્રેસ, વીસીકે અને એમડીએમકે સહિત કુલ 7 દળ સાથે બેઠકોની વહેંચણી અંગે ડીલ ફાઇનલ કરી છે. આ દળો સાથે સમજૂતી ર019ની ફોર્મ્યુલા હેઠળ કરાઈ છે. જેમાં ગત વખતની જેમ જ 9 બેઠક આપવામાં આવી છે. ડીએમકેની મુખ્ય સહયોગી પાર્ટી કોંગ્રેસ સાથે 10 બેઠકોનું ગઠબંધન કરાયું છે.
પૂર્વ ચૂંટણીમાં કોંગ્રેસે 9માંથી 8 અને ગઠબંધને કુલ 39માંથી 38 બેઠક જીતી હતી. વીસીકે (વિદુથલાઈ ચિરુથિગલ કાચી) પાર્ટીને બે બેઠક આપવામાં આવી છે જે બન્ને અનામત છે. વાયકોની આગેવાની હેઠળની એમડીએમકેને એક બેઠક ફાળવાઈ છે.