• રવિવાર, 19 મે, 2024

ઈગા સ્વિયાતેક ફ્રેન્ચ ઓપન ચૅમ્પિયન  

કેરોલિના મુચોવાને હરાવીને ત્રીજી વખત ગ્રાન્ડ સ્લેમ નામે કર્યો

પેરિસ, તા. 10 : દુનિયાની નંબર વન મહિલા ટેનિસ ખેલાડી પોલેન્ડની ઈગા સ્વિયાતેકે ફ્રેન્ચ ઓપન જીતી લીધો છે. સ્વિયાતેકે ત્રીજી વખત આ ગ્રાન્ડ સ્લેમ પોતાના નામે કર્યો છે. તેણે ફાઈનલ મુકાબલામાં ચેક ગણરાજયની કેરોલિન મુચોવાને ત્રણ સેટ સુધી ચાલેલા રોમાંચક મુકાબલામાં હરાવી હતી. સ્વિયાતેકે ફાઈનલમાં 6-2, 5-7, 6-4થી જીત મેળવી હતી. 

સ્વિયાતેકે આ મેચમાં શાનદાર શરૂઆત કરી હતી અને નંબર વન ખેલાડી તરીકે રમી હતી અને પહેલા સેટને સરળતાથી 6-2થી પોતાના નામે કર્યો હતો. બીજા સેટમાં મુચોવાએ વાપસી કરી હતી અને ફાઈનલમાં કેમ પહોંચી તે બતાવી દીધું હતું. તેણે બિનક્રમાંકિત હોવા છતા નંબર વન ખેલાડી સામે હાર માની નહોતી અને બીજા સેટને 7-5થી નામે કરી લીધો હતો. બાદમાં મુકાબલો નિર્ણાયક સેટમાં પહોંચ્યો હતો. તેમાં પણ મુચોવાએ બઢત બનાવી રાખી હતી પણ ફાઈનલનું દબાણ સહન કરી શકી નહોતી. સ્વિયાતેકે પોતાના અનુભવનો ભરપુર ઉપયોગ કરતા સેટને 6-4થી પોતાના નામે કર્યો હતો. આ અગાઉ સ્વિયાતેકે 2020 અને 2022માં પણ ફ્રેન્ચ ઓપન પોતાના નામે કર્યો હતો. આ ઉપરાંત ગયા વર્ષે યુએસ ઓપન જીત્યો હતો. હવે તેની નજર જુલાઈમાં પહેલી વખત વિમ્બલ્ડન જીતવા ઉપર રહેશે.