• બુધવાર, 28 ફેબ્રુઆરી, 2024

ઇઝરાયલે ગાઝામાં શરૂ કર્યો બૉમ્બમારો

હમાસે યુદ્ધવિરામનો ભંગ કર્યો : અમેરિકા

નવી દિલ્હી, તા. 2 : મધ્ય પૂર્વમાં ફરી એકવાર યુદ્ધ શરૂ થયું છે. ગયા શુક્રવારથી ગુરુવાર સુધી ચાલેલો યુદ્ધવિરામ આખરે સમાપ્ત થયો અને ગાઝા પટ્ટી પર ફરી એકવાર બોમ્બનો વરસાદ થવા લાગ્યો. શુક્રવારે સવારે યુદ્ધવિરામ સમાપ્ત થયો, ત્યારબાદ ઈઝરાયેલી સેનાએ ગાઝામાં હવાઈ હુમલો શરૂ કર્યો. કતાર સહિતના આંતરરાષ્ટ્રીય સંગઠનો ગાઝા પટ્ટી પર શાસન કરતા ઈઝરાયેલ અને હમાસ સાથે કરાર કરવા માટે કામ કરી રહ્યા છે. સંયુક્ત રાષ્ટ્ર માનવતાવાદી આયોગના વડા માર્ટિન ગ્રિફિથે યુદ્ધવિરામની માંગ કરી છે. તેમણે કહ્યું કે ગાઝામાં રહેતા પેલેસ્ટાઈનીઓને છુપાવવા માટે કોઈ સ્થાન નથી. હમાસ અને પેલેસ્ટિનિયન ઈસ્લામિક જેહાદે કહ્યું કે, તેઓએ તેલ અવીવ, અશ્દોદ અને અશ્કેલોન સહિત અનેક ઈઝરાયેલ શહેરો પર રોકેટ છોડયા. ઈઝરાયેલ-લેબનોન બોર્ડર પર પણ લડાઈ શરૂ થઈ ગઈ છે. ઈઝરાયેલે શુક્રવારથી જ બોમ્બમારો શરૂ કરી દીધો છે. ઈઝરાયેલની સેનાનું કહેવું છે કે હમાસે તેના પ્રદેશ પર રોકેટ ફાયર કરીને સાત દિવસીય યુદ્ધવિરામનો અંત લાવ્યો હતો. ઈઝરાયેલની સેના હવે ધીમે ધીમે ગાઝા પટ્ટીના દક્ષિણી ભાગ તરફ આગળ વધી રહી છે. ગાઝામાં હાજર પેલેસ્ટિનિયન સ્વાસ્થ્ય મંત્રાલયે કહ્યું છે કે શુક્રવારે સવારથી શરૂ થયેલા ઇઝરાયેલના બોમ્બમારાને કારણે 178 પેલેસ્ટાઈનના મોત થયા છે. આ બોમ્બ ધડાકામાં 589 લોકો ઘાયલ પણ થયા હતા. ઈઝરાયેલ અને હમાસ વચ્ચે યુદ્ધ વિરામ સમાપ્ત થયા બાદ યુદ્ધ શરૂ થયું છે. અલજઝરીના અહેવાલ મુજબ, અમેરિકાએ ઈઝરાયેલને 100 `બંકર-બસ્ટર' બોમ્બ આપ્યા છે, જેમાંથી દરેકનું વજન 907 કિલો છે. અમેરિકાએ આ બોમ્બનો ઉપયોગ અફઘાનિસ્તાન, ઈરાક અને સીરિયામાં કર્યો છે. હવે ઈઝરાયેલ ગાઝામાં આ બોમ્બનો ઉપયોગ કરવા જઈ રહ્યું છે. 

કમિટી ટુ પ્રોટેક્ટ જર્નાલિટ્સએ જણાવ્યું છે કે 7 ઓક્ટોબરથી ઈઝરાયેલ અને હમાસ વચ્ચે યુદ્ધ શરૂ થયું ત્યારથી ઓછામાં ઓછા 61 પત્રકારોના મોત થયા છે. માર્યા  ગયેલા લોકોમાં મોટાભાગના પ4 પેલેસ્ટિનિયન પત્રકારો છે. આ સિવાય ચાર ઈઝરાયેલ અને ત્રણ લેબનીઝ પત્રકારોના પણ મોત થયા છે. સીએનએનના અહેવાલ મુજબ, કતાર, અમેરિકા અને ઈજીપ્તની સલાહ પર, ઈઝરાયેલ અને હમાસ હજુ પણ મહિલા બંધકોને મુક્ત કરવાની વાત કરી રહ્યા છે. એવી અપેક્ષા રાખવામાં આવે છે કે હમાસ દ્વારા બંધકોની યાદી મળતાની સાથે જ યુદ્ધવિરામ ફરી શરૂ થઈ શકે છે. ઈઝરાયેલી સેનાએ કહ્યું છે કે તેણે ગાઝામાં હમાસના સ્થાનોને નિશાન બનાવ્યા છે. સેનાનું કહેવુ છે કે સ્થાનિક સમય મુજબ સવારે 7 વાગ્યા સુધીમાં ર00થી વધુ ટાર્ગેટ પર હુમલો કરવામાં આવ્યો છે. ઈઝરાયેલના યુદ્ધ કેબિનેટ પ્રધાન બેની ગેન્ટઝે કહ્યું છે કે સેના તેની કામગીરી વધારવા માટે તૈયાર છે. ફરી યુદ્ધ શરૂ થયા બાદ અમેરિકાએ પણ પેલેસ્ટનિયન નાગરિકોની સુરક્ષા માટે ઈઝરાયેલ પર દબાણ બનાવવાનું શરૂ કરી દીધુ છે. અમેરિકી વિદેશ પ્રધાન એન્ટની બ્લિંકને કહ્યું છે કે તેમણે નાગરિકોની સુરક્ષાને લઈને ઈઝરાયેલ દ્વારા ઉઠાવવામાં આવેલા પગલા જોયા છે. ઈઝરાયલ અને હમાસ વચ્ચે મધ્યસ્થી કરી રહેલા કતારે ગાઝામાં બોમ્બમારો શરૂ થવા પર દુખ વ્યક્ત કર્યુ છે. કતારના વિદેશ મંત્રાલયે કહ્યું છે કે, ગાઝામાં બોમ્બ વિસ્ફોટથી મધ્યસ્થી પ્રયાસો જટિલ છે અને માનવતાવાદી દુર્ઘટનામાં વધારો થયો છે. અમેરિકી વિદેશ પ્રધાન એન્ટની બ્લિંકને કહ્યું છે કે આપણે એ સમજવાની જરૂર છે કે હમાસના કારણે સાત દિવસીય યુદ્ધવિરામ સમાપ્ત થયો છે. મધ્યસ્થતાના નિયમો તોડીને હમાસે જેરુસલેમ પર હુમલો કર્યો અને ત્રણ લોકોની હત્યા કરી. સીરિયાની સરકારી સમાચાર એજન્સી એસએએનએનું કહેવું છે કે શનિવારે રાજધાની દમાસ્ક્સમાં ઈઝરાયેલના હુમલાને નિષ્ફળ બનાવી દેવામાં આવ્યો હતો. ઈઝરાયેલથી રાજધાની તરફ મિસાઈલો છોડવામાં આવી હતી, જેને એર ડિફેન્સ સિસ્ટમ દ્વારા તોડી પાડવામાં આવી હતી.