લૉકડાઉન બાદ ભારત અમુક આંતરરાષ્ટ્રીય ફ્લાઈટ્સને પરવાનગી આપી શકે છે

લૉકડાઉન બાદ ભારત અમુક આંતરરાષ્ટ્રીય ફ્લાઈટ્સને પરવાનગી આપી શકે છે
મુંબઈ, તા 4: લૉકડાઉન બાદની સ્થિતિના આધારે અને ક્યા દેશમાંથી આવે છે એના આધારે આંતરરાષ્ટ્રીય ફ્લાઈટ્સ શરૂ કરવા અંગે નિર્ણય લેવાશે એમ નાગરિક ઉડ્ડયન પ્રધાન હરદીપ સિંઘ પુરીએ ગુરૂવારે જણાવ્યું હતું. કોઈ પણ આવનારી ફ્લાઈટ જેમાં ભારતીયો વતન પાછા ફરવાના હોય તેમણે પણ લૉકડાઉન પાછું ખેંચાય ત્યાં સુધી રાહ જોવી પડશે એમ તેમણે પત્રકાર પરિષદમાં જણાવ્યું હતું. 
માર્ચ 23ના સરકારે તમામ ઈન્ટરનેશનલ ફ્લાઈટ્સને ભારતમાં લેન્ડિગ કરવા પર પ્રતિબંધ મુક્યો હતો. થોડા દિવસો બાદ લૉકડાઉનની જાહેરાતને પગલે રાષ્ટ્રીય હવાઈ સેવા પણ બંધ કરવામાં આવી હતી. ભારતની હવાઈ સીમા પરથી પસાર થતાં વિમાનોની સંખ્યામાં પણ 60 ટકા જેટલો ઘટાડો નોંધાયો હતો. હાલના તબક્કે લૉકડાઉન 14 એપ્રિલે પૂરો થઈ રહ્યો છે, ત્યારે ખાનગી એરલાઈન્સ 15 એપ્રિલથી બાકિંગ શરૂ કરી શકે છે. 
એપ્રિલની મધ્ય સુધી લૉકડાઉન રહેશે એ હિસાબે મંત્રાલય કાર્ય કરી રહ્યું છે. એરલાઈન્સ પણ તેમની તૈયારી એ મુજબ શરૂ કરે, જોકે અમે કોઈ આદેશ આપતા નથી. પરંતુ તેમણે તેમની સૂઝબૂઝથી નિર્ણય લેવાના છે. મને આશા છે કે 15 એપ્રિલથી ફ્લાઈટ શરૂ થશે. પરંતુ એ સમયે કેવી પરિસ્થિતિ છે એના પર બધો આધાર રહેલો છે, એમ પુરીએ જણાવ્યું હતું. 
દરમ્યાન, સરકારની માલિકીની એર ઈન્ડિયા જર્મની, કેનેડા, ફ્રાન્સ અને આયર્લેન્ડ માટે 18 આંતરરાષ્ટ્રીય ફ્લાઈટ સંબંધિત દેશોની વિનંતીને પગલે ઓપરેટ કરશે. આ ફ્લાઈટમાં ચારેય દેશોના નાગરિકોને લઈ જવાશે અને વળતા પ્લેન ખાલી પાછું ફરશે એમ એર ઈન્ડિયાના ચેરમેન રાજીવ બંસલે જણાવ્યું હતું. એર ઈન્ડિયાએ અત્યાર સુધીમાં જપાન, વુહાન, ઈરાન અને ઈટલીમાં ફસાયેલા 1500 ભારતીયોને પાછા ભારત લાવવા ફ્લાઈટ ઓપરેટ કરી હતી. સરકારી માલિકીની એર લાઈન્સને 4 અને 5 એપ્રિલે ખાસ મેડિકલ કાર્ગો માટે દિલ્હી-શાંઘાઈ ફ્લાઈટની પરવાનગી 
અપાઈ હતી. 
લૉકડાઉન દરમ્યાન જીવનજરૂરી ચીજવસ્તુઓની હેરાફેરી માટે ખાસ ફ્લાઈટને પરવાનગી અપાઈ હતી. ડાયરેક્ટોરેટ જનરલ અૉફ સિવિલ એવિયેશન (ડીજીસીએ)એ બુધવારે પેસેન્જર એરક્રાફ્ટને લૉકડાઉનના સમયગાળઆ દરમ્યાન કાર્ગો લઈ જવાની પરવાનગી આપી હતી. સરકારી આદેશને પગલે સરકારી માલસામાન ફ્રીમાં લઈ જવાની શરતે ખાનગી સંસ્થાઓનો કાર્ગો કોમર્શિયલ દરે હેરફેર કરવાની પરવાનગી પ્રાઈવેટ એરલાઈન્સને અપાઈ હોવાનું મંત્રાલયના એક અધિકારીએ જણાવ્યું હતું. 

© 2020 Saurashtra Trust

Developed & Maintain by Webpioneer