ભારતીય આઈટી કંપનીઓને અમેરિકાના એચ-1બી વિઝા નકારવાનું ઓલટાઈમ હાઈ

પુણે, તા. 10 : ભારતની સૌથી મોટી આઈટી સર્વિસ કંપનીઓને તેમના કર્મચારીઓને અમેરિકામાં મોકલવા માટેના વર્ક વિઝા (એચ-1બી) નકારવામાં `ઓલટાઈમ હાઈ' વધારો થયો છે, એવું અમેરિકા ખાતેના એક રિસર્ચ ફાઉન્ડેશન પાસેથી મળેલી માહિતીમાં જણાવ્યું છે.
દેશની સૌથી મોટી ચાર સોફટવેર સર્વિસ એક્સપોર્ટર્સ કંપનીઓ- તાતા કન્સલ્ટન્સી સર્વિસીસ, ઈન્ફોસીસ, એચસીએલ ટેક્નૉલૉજીસ અને વિપ્રોની ગત વર્ષમાં લગભગ અડધા જેટલી વિઝા અરજીઓ નકારી કાઢવામાં આવી હતી. પ્રમુખ ડોનાલ્ડ ટ્રમ્પના વહીવટી તંત્રએ સ્થાનિક અમેરિકનોને વધુ રોજગારીઓ અને વધુ વેતન આપવાની નીતિ અખત્યાર કરી એ બાદ આ ભારતીય કંપનીઓની વિઝા અરજીઓ મોટા પાયે નકારવામાં આવી રહી છે. નાણાકીય વર્ષ 2015માં ટીસીએસની માત્ર 6 ટકા વિઝા અરજીઓ જ નકારવામાં આવી હતી જે 2019માં અૉક્ટોબરથી ડિસેમ્બરના ત્રિમાસિકમાં 37 ટકા ઉપર પહોંચી હતી, એમ નેશનલ ફાઉન્ડેશન ફોર અમેરિકન પૉલિસી (એનએફએપી)ના એક અહેવાલમાં જણાવ્યું છે. આ ફાઉન્ડેશને આ માહિતી યુએસ સિટિઝનશિપ ઍન્ડ ઈમિગ્રેશન સર્વિસીસ પાસેથી મેળવી હતી.
2015માં વિપ્રોની વિઝાની માત્ર 7 ટકા અરજીઓ નકારવામાં આવી હતી જે 2019માં વધીને 62 ટકા થઈ હતી. 2015માં ઈન્ફોસીસની માત્ર બે ટકા અરજીઓ નકારવામાં આવી હતી જે 2019માં 57 ટકા જેટલી થઈ હતી અને એચસીએલ અમેરિકાની બે ટકા અરજીઓ સામે 2019માં 43 ટકા અરજીઓ નકારવામાં આવી હતી.
બીજી તરફ રિકવેસ્ટ ફોર એવિડન્સ (આરઈએફ)ની સંખ્યામાં મોટો વધારો થયો છે. અગાઉ આરઈએફ માટેનાં 30થી 50 પાનાં માગવામાં આવતાં હતાં જે હવે વધીને 600થી 1000 પાનાં ઉપર પહોંચ્યાં છે.
આરઈએફ બાદ પણ વિઝા નકારવાની સંખ્યા વધી છે એટલું જ નહીં એનાથી કંપનીઓનું પેપરવર્ક તેમ જ ખર્ચ પણ વધે છે.
પ્રમુખ ટ્રમ્પના `બાય અમેરિકન, હાયર અમેરિકન'ના આદેશને કારણે ભારતીય આઈટી કંપનીઓને વિઝા નકારવાની સંખ્યામાં તોતિંગ વધારો થયો છે.

© 2019 Saurashtra Trust

Developed & Maintain by Webpioneer