સી-લિંક પરથી આત્મહત્યા કરનાર પાર્થ સોમાણી ભારે ડિપ્રેશનમાં હતો

આશાસ્પદ યુવકના અગ્નિસંસ્કાર વરલીમાં થયા

મુંબઈ, તા. 13 : આશાસ્પદ કચ્છી યુવક પાર્થ સોમાણીએ શુક્રવારે સી-લિંક પરથી ઝંપલાવીને આત્મહત્યા કર્યા બાદ નાયર હૉસ્પિટલમાં પોસ્ટમૉર્ટમ બાદ આજે કચ્છથી આવેલાં માતા-પિતાને પાર્થનો મૃતદેહ સુપરત કરાયો ત્યારે ભાવુક દૃશ્યો સર્જાયાં હતાં. બાવીસ વર્ષના પાર્થની સ્મશાનયાત્રા સાંજે સાડા ચાર વાગ્યે નાયર હૉસ્પિટલથી વરલી હિંદુ સ્મશાન ભૂમિ (વૈકુંઠધામ) સુધી નીકળી હતી તેમાં સમાજના કેટલાય લોકો હાજર રહ્યા હતા અને સોમાણી પરિવારને સાંત્વના આપતા હતા. શુક્રવારે બપોર બાદ દરિયામાં ઝંપલાવનારા પાર્થની શોધખોળ શરૂ થઇ હતી અને મોડી રાત્રે તેનો મૃતદેહ મળી આવ્યો હતો. આ સર્ચ અૉપરેશનમાં એક હેલિકૉપ્ટર ઉપરાંત નૌકાદળના જવાનોની પણ મદદ લેવામાં આવી હતી.  
દરમિયાન પાર્થ સંબંધી કેટલીક વાતો બહાર આવી છે. મૂળ લખપત (કચ્છ)નો આ યુવક કંપની સેક્રેટરી એક્ઝિક્યુટિવનો અભ્યાસ કરતો હતો અને મુલુંડમાં આવેલી જ્ઞાતિની હૉસ્ટેલમાં બે વર્ષથી રહેતો હતો. માહેશ્વરી સમાજનો આ પરિવાર લખપત તાલુકાના દયાપરનો છે અને હાલમાં તેઓ ભુજમાં રહે છે. 
હૉસ્ટેલમાં તેને ઓળખતા વિદ્યાર્થીઓના જણાવ્યા પ્રમાણે પાર્થ અંતર્મુખી હતો, બધાં સાથે બહુ હળવા-મળવાનું તેને પસંદ નહોતું. હૉસ્ટેલની રૂમમાં પોતાનું લૉકર ખુલ્લું રાખીને તે બહાર ગયો હતો, પરંતુ હૉસ્ટેલના રજિસ્ટરમાં પોતે બહાર ગયાની સાઇન કર્યા વગર જ તે ગઇ કાલે નીકળી ગયો હતો. 
એક વિદ્યાર્થીના જણાવ્યા પ્રમાણે તાજેતરમાં તે એક સંબંધીને ત્યાં પાર્ટીમાં ગયો હતો ત્યારે પણ અતડો-અતડો જણાયો હતો અને છેલ્લા થોડા દિવસથી તે કોઇ માનસિક તણાવમાં હોવાનું હવે અમને જણાઇ આવે  છે. કેમ કે તે લગભગ કામ સિવાય કોઇની સાથે વાતચીત પણ નહોતો કરતો. તેના સામાન કે રૂમમાંથી કો સુસાઇડ નોટ કે ટેન્શન સંબંધી ચિઠ્ઠી મળી ન હોવાનું પણ સૂત્રોએ કહ્યું હતું. 
શુક્રવારે બપોરે સવા વાગ્યે તે વરલીથી ટૅક્સીમાં બાંદ્રા જવા નીકળ્યો હતો. મળતી માહિતી પ્રમાણે તેણે બાંદ્રાથી પરત ટૅક્સી સી-લિંક પર લેવાનું કહીને વચ્ચે પોલ નંબર બાવન પર ટૅક્સી ઊભી રાખવાનું ડ્રાઇવરને કહ્યું હતું. વરલીથી બાંદ્રા સુધી જતી વેળા કદાચ તેણે આ જગ્યાએથી ઝંપલાવવાનું નક્કી કર્યું હશે તેથી જ તેણે ટૅક્સીને પરત વરલી તરફ લેવાનું કહ્યું હોવું જોઇએ. પોલીસે ટૅક્સી ડ્રાઇવરનું નિવેદન પણ નોંધ્યું છે અને આ કેસની તપાસ થઇ રહી છે. 
પાર્થ પોતાનો મોબાઇલ ફોન અને સાથે રાખેલું પર્સ (પાકીટ) પણ ટૅક્સીમાં જ છોડીને ગયો હતો અને તેના પરથી જ પાર્થની ઓળખ થઇ હતી. તપાસ દરમિયાન જણાયું હતું કે આત્મહત્યા કરતાં પહેલાં પાર્થે તેના મોબાઇલમાંથી ઇન્સ્ટાગ્રામ અને ફેસબુક સહિતના સોશિયલ મીડિયાના એકાઉન્ટ્સ ડિસકનેક્ટ કરી નાખ્યાં હતાં. છેલ્લે તેણે થાણેમાં રહેતા પોતાના પિતરાઇ ભાઇ સાથે વાત કરીને પોતે સી-લિંક પર હોવાનું કહ્યું હતું.
સોમાણી પરિવારના સ્વજનોના જણાવ્યા પ્રમાણે ભુજમાં મુંદરા રિલોકેશન સાઇટના પ્રમુખ સ્વામીનગરમાં સ્થાયી થયેલો પાર્થનો પરિવાર મધ્યમ વર્ગનો છે અને પાર્થના પિતા નરેન્દ્ર સોમાણી પ્લમ્બિંગનું કામ કરે છે. 

© 2019 Saurashtra Trust

Developed & Maintain by Webpioneer