ભવ્ય આરંભ બાદ ભારતનો ધબડકો

ભવ્ય આરંભ બાદ ભારતનો ધબડકો
ધવનની ધૂંઆધાર સદી (123 દડામાં 119) અને રાહુલની સળંગ સાતમી અર્ધસદી

ટીમ ઇન્ડિયાના પહેલા દિવસે 6/328

કેન્ડી,તા.12 : શિખર ધવનની વધુ એક સદી(123 દડામાં 119)  તેમજ કે.એલ.રાહુલની સળંગ સાતમી અર્ધસદી (8પ)ના સહારે અહીં ત્રીજી ટેસ્ટમાં પણ ટીમ ઈન્ડિયાએ મજબૂત આરંભ કર્યો હતે. જો કે, પહેલી વિકેટની 188 રનની ભાગીદારી બાદ વિકેટોનું ઝડપી પતન થતાં પહેલા દિવસના અંતે 6 વિકેટે 329 રન થયા હતા. સહા 13 રને તેમજ પંડયા એક રને દાવમાં છે. 

ધવન અને રાહુલે આજે શાનદાર શરૂઆત કરી હતી અને લંકાના બોલરોને ચોમેર ઝૂડી કાઢ્યા હતા. ભારતે માત્ર 17.2 ઓવરમાં જ 100 રન બનાવી લીધા હતા. ખાસ તો ધવને પહેલી ટેસ્ટની માફક જ ધુંઆધાર બેટિંગ કરી હતી. શિખરે 45 દડામાં જ અર્ધસદી પૂરી કરી લીધી હતી અને 107 દડામાં સદી પૂરી કરી હતી. બીજી બાજુ રાહુલે પણ ઝમકદાર બેટિંગ કરી હતી. પણ કમનસીબે તે સદી ચૂક્યો હતો અને 8પ રને પુષ્પકુમારાનો શિકાર બન્યો હતો. તેણે 135 દડામાં 88 રન કર્યા હતા. બંનેએ 188 રનની વિક્રમી ભાગીદારી નોંધાવી હતી. પૂજારા જો કે,નિષ્ફળ રહ્યો હતો અને માત્ર 8 રને આઉટ થયો હતો. તો રહાણે (17) પણ જામ્યો નહોતો. વિરાટ લયમાં હતો પણ મોટો સ્કોર કરી શક્યો નહોતો અને 42 રને સન્દાકનનો શિકાર બન્યો હતો. જ્યારે અશ્વિને 31 રન કર્યા હતા. 

ટીમ ઈન્ડિયામાં ત્રીજા ઝડપી બોલર ભુવનેશ્વર કુમારના સમાવેશની અટકળો ખોટી ઠરી હતી અને ચાઈનામેન કુલદીપ યાદવને તક અપાઈ હતી. પુષ્પકુમારાએ 40 રનમાં ત્રણ અને સન્દાકને 84 રનમાં બે વિકેટ ખેરવી હતી.

© 2017 Saurashtra Trust

Developed & Maintain by Webpioneer